KUK Local Chapters

ಕನ್ನಡಿಗರು ಯುಕೆ ವತಿಯಿಂದ ಯೋಗ ಗುರುಮಾ ಭಾಗೀರಥಿ ಅವರೊಂದಿಗೆ ಸಂವಾದ

ಕನ್ನಡಿಗರುಯುಕೆ ಮತ್ತೆ “ಕಾಫಿ ಜೊತೆ ಮಾತುಕತೆ”ಯೊಂದಿಗೆ ಬಂದಿದ್ದು, ಈ ಬಾರಿ ಒಂದು ಉತ್ತಮವಾದ ಸಂಭಾಷಣೆಯನ್ನ ಯುಕೆಯ ಕನ್ನಡಿಗರಿಗಾಗಿ ತಂದಿದ್ದು ವಿಶೇಷ. ಈ ಬಾರಿ ಯೋಗ ಗುರುಮಾರಾದ Dr ಭಾಗೀರಥಿ ಕನ್ನಡತಿ ಅವರೊಂದಿಗೆ ಫೆಬ್ರವರಿ ೬ನೇ ತಾರೀಕು ಮಧ್ಯಾಹ್ನ ೨ಗಂಟೆಗೆ ನಡೆದ ಸಂಭಾಷಣೆ ಯೋಗದ ಮೇಲೆ ಕೇಂದ್ರಿತವಾಗಿತ್ತು. ಆ ಸಂಭಾಷಣೆಯನ್ನ ಕನ್ನಡಿಗರುಯುಕೆ ಕಾರ್ಯಕಾರಿ ಸಮಿತಿಯ ಶ್ರೀ ಗಣಪತಿ ಭಟ್, ಶ್ರೀ ಅನಿಲ್ ಕೊಂಡೆಬೆಟ್ಟು ಮತ್ತು ಶ್ರೀಮತಿ ಪವಿತ್ರ ಅವರು ನೆಡೆಸಿಕೊಟ್ಟರು. ಅದರ ಕೆಲವು ತುಣುಕುಗಳು ಕೆಳಗಿನಂತಿವೆ
ಮೊದಲಿಗೆ ಯೋಗ ಗುರುಮಾರಾದ Dr ಭಾಗೀರಥಿ ಅವರ ಯೋಗ ತರಬೇತಿಗಳು ಯುಕೆಯ ಕನ್ನಡಿಗರಿಗೆ ಯಾವ ರೀತಿ ಉಪಯೋಗ ಮಾಡಿದೆ ಎಂಬುದರ ಮೇಲೆ ಒಂದು ಚಿಕ್ಕ ವಿಡಿಯೋ ತುಣುಕು ಪ್ರಸಾರಮಾಡಿ ನಂತರ ಅನಿಲರವರು Dr ಭಾಗೀರಥಿಯವರ ಪರಿಚಯವನ್ನ ಮಾಡಿಕೊಟ್ಟರು. ಆರ್ಯಭಟ ಇಂಟರ್ನ್ಯಾಷನಲ್ ಅವಾರ್ಡ್, ನಾಡಪ್ರಭು ಕೆಂಪೇಗೌಡ ಅವಾರ್ಡ್, ಇಂಟರ್ನ್ಯಾಷನಲ್ ಬೆಸ್ಟ್ ಯೋಗ ಅವಾರ್ಡ್, ಯೋಗ ಭೂಷಣ ನ್ಯಾಷನಲ್ ಅವಾರ್ಡ್ ಮತ್ತು ವೇದಿಕ್ ವೆಲ್ನೆಸ್ ಯೂನಿವರ್ಸಿಟಿ, ಫ್ಲೋರಿಡಾ (USA ) ಯಿಂದ ಡಾಕ್ಟರ್ ಆಫ್ ಫಿಲಾಸಫಿ ಇನ್ ಯೋಗ ಅಂಡ್ ಆಯುರ್ವೇದ (honrary ಡಿಗ್ರಿ) ಪಡೆದು ಇಂಡಿಯಾ ಅಲ್ಲದೆ UK ಮತ್ತು ಇನ್ನು ಹಲವು ದೇಶಗಳಲ್ಲಿ ತಮ್ಮ ಯೋಗದ ಕಲೆಯನ್ನ ಕಲಿಸಿಕೊಡುವುದಲ್ಲದೆ ಅದರ ಚಮತ್ಕಾರವನ್ನ ತೋರಿಸಿಕೊಟ್ಟಿದ್ದಾರೆ ಎಂದು ಮುಂದಿನ ಪ್ರಶ್ನೆ ಕೇಳುವ ಸರದಿಯನ್ನ ಪವಿತ್ರ ರವರಿಗೆ ವಹಿಸಿದರು.

ಪವಿತ್ರ: ನಿಮ್ಮ ಬಾಲ್ಯದ ದಿನಗಳು ಹೇಗಿದ್ದವು, ಯೋಗ ನಿಮಗೆ ಸ್ಫೂರ್ತಿ ನೀಡಿದ್ದು ಯಾವಾಗ? ನಿಮ್ಮ ಯೋಗ ಗುರುಗಳು ಯಾರಾಗಿದ್ದರು? ಹಾಗೆಯೇ ನಿಮ್ಮ ಹೆಸರಲ್ಲಿ “ಕನ್ನಡತಿ” ಎಂದು ಬರಲು ಕಾರಣವೇನು?
Dr ಭಾಗೀರಥಿ: ನನ್ನ ಹುಟ್ಟೇ ಒಂದು ಯೋಗ ಅಂತ ಹೇಳಬಹುದು. ತಂದೆ ತಾಯಿಗೆ ಬೇಡವಾದ ನಾಲ್ಕನೆಯ ಹೆಣ್ಣು ಮಗುವಾಗಿ ಹುಟ್ಟಿದ್ದುಒಂದು ಕಾಡಿನಂತಿದ್ದ ಪ್ರದೇಶದಲ್ಲಿ ‘ಕಾಡುಪಾಪ’ ಆಗಿ ಬೆಳೆದ ನಾನು, ಮೊದಲಿನಿಂದಲೂ ತುಂಬಾ ಧೈರ್ಯವಂತೆ. ಹಾಗೆ ತುಂಬಾ ನಿಧಾನವಾಗೇ ಶಾಲೆಗೇ ಸೇರಿದರೂ ಅಲ್ಲಿ ತುಂಬಾ ಶ್ರದ್ದೆಯಿಂದ ಎಲ್ಲ ಪಾಠಗಳನ್ನ ಕಲಿಯುತ್ತಿದ್ದೆ.
ನನ್ನ ಮೊದಲ ಗುರು ನನ್ನ “ಅವ್ವ(ಅಜ್ಜಿ)”. ಚಿಕ್ಕಂದಿನಿಂದ ಅವರ ಜೊತೆ ಇದ್ದಿದ್ದರಿಂದ ಅವರು ಪೂಜೆ ಪಾಠಗಳಾಗಿರಬಹುದು, ಸಂಧ್ಯಾ ವಂದನೆ, ಲಿಂಗ ಪೂಜೆ, ಗುರು ಹಿರಿಯರನ್ನ ಗೌರವಿಸುದು ಇನ್ನು ಹಲವಾರು ಜೀವನ ಪಾಠಗಳನ್ನ ಅವರಿಂದ ಕಲಿತಿದ್ದೀನಿ.
RSS ಶಿಬಿರದಿಂದ ಶುರುವಾದ ಯೋಗ, ನಾನು ಆರನೇ ಶಾಲೆಯಲ್ಲಿ ಕಲಿಯುವಾಗ “ನಿರ್ವಾಣಪ್ಪನವರು” ತಮ್ಮ ಯೋಗ ಶಿಕ್ಷಣದ ಮೂಲಕ ಎಲ್ಲೊ ಒಂದು ವಿಶ್ವ ರೂಪ ದರ್ಶನ ಮಾಡಿಸಿದವರು. ಅಲ್ಲಿಂದ ಯೋಗ ಹಾಗೆ ಮುಂದುವರಿಯುತ್ತಾ ಬಂದಿದೆ.
SSLC ಮುಗಿಸಿದ ನಂತರ ಬೆಂಗಳೂರಿಗೆ ಬಂದು ಯೋಗ ಮತ್ತು ಶಿಕ್ಷಣ ಮುಂದುವರೆಸುವಾಗ, A1 ಸ್ಪೋಕನ್ ಇಂಗ್ಲಿಷ್ ಸೆಂಟರ್ ಅಲ್ಲಿ ಬರುವ ಕನ್ನಡೇತರರಿಗೆ ಕನ್ನಡ ಕಲಿಸುವ ನನ್ನ ಇಂಗಿತ ನಿಜವಾಗುವುದಕ್ಕೆ ಕಾರಣ ಆಸ್ಟ್ರೇಲಿಯಾದ ಒಬ್ಬ ವ್ಯಕ್ತಿ. ಅವರ ಕನ್ನಡ ಕಲಿಯುವ ಬಯಕೆ ನನ್ನ ಮೂಲಕ ಈಡೇರಿತು. ಅಲ್ಲಿಂದ ಕನ್ನಡಕ್ಕಾಗಿ ಶುರುವಾದ ಸೇವೆ ಇವತ್ತಿಗೂ ಹಾಗೆಯೇ ಇದೆ ಹಾಗಾಗಿ “ಕನ್ನಡತಿ” ಎಂದು ಬಂದಿದೆ.

ಗಣ: ಇಂದು ನೀವು ಹಲವಾರು ದೇಶಗಳಲ್ಲಿ ಕನ್ನಡಿಗರಿಗೆ, ಕನ್ನಡೇತರರಿಗೆ ಹಾಗೂ ಆಯಾ ದೇಶಗಳ ಜನರಿಗೆ ಯೋಗ ಪಾಠವನ್ನು ಅಚ್ಚು ಕಟ್ಟಾಗಿ ಆನ್ಲೈನ್ ಮೂಲಕ ಕಲಿಸುತ್ತಿದ್ದೀರಿ. ಈ ಒಂದು ವಿಚಾರ ನಿಮಗೆ ಹೇಗೆ ಬಂತು ?
Dr ಭಾಗೀರಥಿ: ೨೦೧೯ರಲ್ಲಿ ದುಬೈನಲ್ಲಿ ಫಿಸಿಕಲ್ ಅಂಡ್ ಕಲ್ಚರಲ್ ಟ್ರೈನರ್ ಆಗಿ ಕೆಲಸ ಮಾಡುವಾಗ ಕೋವಿಡ್-೧೯ ಕಾರಣ ಕೆಲಸ ಕಳೆದುಕೊಂಡೆ. ಅಷ್ಟೊತ್ತಿಗೆಗಾಗಲೇ ಆನ್ಲೈನ್ನಲ್ಲಿ ಕೆಲವು ವಿದ್ಯಾರ್ಥಿಗಳಿಗೆ ತರಬೇತಿಗಳನ್ನ ಕೊಡುತ್ತಿದ್ದ ಕಾರಣ. ಇದನ್ನ ಇನ್ನು ಹೆಚ್ಚು ಹೆಚ್ಚಾಗಿ ಯಾಕೆ ಮಾಡಬಾರದು ಅಂತ ಯೋಚನೆ ಬಂದಿದ್ದು. ಅಲ್ಲಿನ ಮುಖ್ಯಸ್ಥರಾದ ಶಶಿಧರ್ ನಾಗರಾಜಪ್ಪನವರು ನನ್ನ ಅನಿಸಿಕೆಯನ್ನ ಕೇಳಿ ತಕ್ಷಣ ಚಾಲ್ತಿಗೆ ತಂದರು. ಆದರೆ ಅದಕ್ಕೆ ದೊಡ್ಡ ತಿರುವನ್ನ ಕೊಟ್ಟಿದ್ದು ಕನ್ನಡಿಗರುಯುಕೆ ಒಂದು ಮೊಳಕೆ ಇಂದ ಶುರುವಾಗಿ ಇಂದು ದೊಡ್ಡ ಮರವಾಗಿದೆ. ನಾನೇನೂ ಅಲ್ಲ ಯೋಗ ಮತ್ತು ಕನ್ನಡಿಗರುಯುಕೆ ನನ್ನಿಂದ ಈ ಕೆಲಸಗಳನ್ನ ಮಾಡಿಸ್ತಾ ಇವೆ.

ಅನಿಲ್: ಕೆಲವರು ಯೋಗ ಯಾವ ಧರ್ಮಕ್ಕೂ ಸೇರಿದ್ದಲ್ಲ ಅನ್ನುತ್ತಾರೆ, ಆದರೆ ನಮಗೆ ಗೊತ್ತೇ ಇದೆ, ಯೋಗ ಸಮಸ್ತ ವಿಶ್ವಕ್ಕೆ ಹಿಂದೂ ಋಷಿಗಳ ಕೊಡುಗೆ ಎಂದು. ಪಾಶ್ಚಾತ್ಯ ದೇಶಗಳಲ್ಲಿ ಯೋಗ ಇಂದು ತುಂಬಾ ಪ್ರಚಲಿತವಾಗಿದೆ. ನಿಮ್ಮ ಪ್ರಕಾರ ಯೋಗದ ಬಗ್ಗೆ ಹಾಗೂ ಅದರ ಮಹತ್ವದ ಬಗ್ಗೆ ನೀವು ಹೇಳುವುದೇನು ?
Dr ಭಾಗೀರಥಿ: ಯೋಗವನ್ನ ಹಿಂದೂ ಋಷಿ ಮುನಿಗಳು ಪರಿಚಯಿಸಿದ್ದು. ಆದರೆ ಯೋಗ ಹಿಂದೂ ಧರ್ಮಕ್ಕೆ ಮಾತ್ರ ಸೀಮಿತ ಅಂತ ಎಲ್ಲೂ ಹೇಳಿಲ್ಲ. ಈ ಯೋಗ ಪ್ರತಿ ಧರ್ಮಕ್ಕೂ ಅನ್ವಯ. ಇದರಲ್ಲಿ ಯಾವ ಗೊಂದಲವು ಇಲ್ಲ.

ಪವಿತ್ರ: ಯೋಗಾಸನದ ಬಗ್ಗೆ ಭ್ರಮೆ ಹಾಗೂ ವಾಸ್ತವತೆ ಎರಡನ್ನು ನಾವು ಕೇಳಿದ್ದೇವೆ. ಈ ಹಿನ್ನಲೆಯಲ್ಲಿ ಯೋಗದ ಬಗ್ಗೆ ನಿಮ್ಮ ಸ್ಪಷ್ಟೀಕರಣ ಕೊಡಬಹುದಾದ್ದಲ್ಲಿ ನಿಮ್ಮ ಪ್ರಕಾರ ಜನರಿಗೆ ಇದರ ಬಗ್ಗೆ ಏನು ತಿಳಿಸುವ ಮಾಹಿತಿಗಳಿವೆ? ಹಾಗೆಯೇ ಯೋಗ ಮುಖಾಮುಖಿಯಾಗಿ ಕಲಿಸುವದಕ್ಕಿಂತ ಆನ್ಲೈನ್ ನಲ್ಲಿ ಕಲಿಸುವಾಗ ಯಾವ ರೀತಿಯ ಸವಾಲುಗಳೆದುರಾಗುತ್ತವೆ?
Dr ಭಾಗೀರಥಿ: ಒಂದು ಸಂಪೂರ್ಣವವಾಗಿ ತಿಳಿದುಕೊಂಡವನು ಭ್ರಮೆಯಲ್ಲಿ ಇರುವುದಿಲ್ಲ ಹಾಗೆ ತುಂಬಾ ದಡ್ಡನಾದವನು ಕೂಡ ಭ್ರಮೆಯಲ್ಲಿ ಇರುವುದಿಲ್ಲ. ಯೋಗದ ಬಗ್ಗೆ ಭ್ರಮೆ ಇರುವವರು ಯೋಗದ ಬಗ್ಗೆ ಪೂರ್ತಿ ಅರಿವಿಲ್ಲದವರು ಮಾತ್ರ. ಅದರ ಪರಿಣಾಮ ಗೊತ್ತಾಗಬೇಕಾದರೆ ನೀವು ಅದನ್ನ ಅನುಭವಿಸಬೇಕು. ಅನುಭವಿಸಿದವರು ಮಾತ್ರ ವಾಸ್ತವದಲ್ಲಿ ಬದುಕಲು ಸಾಧ್ಯ.
ಶ್ರದ್ದೆ, ಆಸಕ್ತಿ ಇಲ್ಲದೆ ಹೋದರೆ ಎಲ್ಲವೂ ಸವಾಲುಗಳಾಗಿ ಕಾಣಿಸುತ್ತೆ. ಸ್ಥಳ ಮಹಿಮೆಯ ಕೊರತೆಯೊಂದು ಎದುರಾಗಬಹುದು ಆದರೆ ಅದಕ್ಕೆ ನಾವು ಹೊಂದಿಕೊಂಡಾಗ ಯಾವ ಕುಂದು ಕೊರತೆಯು ಇರುವುದಿಲ್ಲ. ಹಾಗೆ ಆನ್ಲೈನ್ನಲ್ಲಿ ಕಲಿಸುವಾಗ ಇಲ್ಲಿತನಕ ಯಾವುದೇ ತೊಂದರೆ ಅಂತ ನೋಡಿಲ್ಲ ನೆಟ್ವರ್ಕ್ ಪ್ರಾಬ್ಲಮ್ ಒಂದನ್ನ ಬಿಟ್ಟು.

ಗಣ: ಯೋಗದಲ್ಲಿ ಹಲವಾರು ವಿಧಗಳನ್ನ ನಾವು ಕೇಳುತ್ತೇವೆ. ಉದಾಹರಣೆಗೆ ಪತಂಜಲಿ ಅಷ್ಟಾಂಗ ಯೋಗ, ಆಸನಗಳು, ಹಠಯೋಗ, ರಾಜಯೋಗ . ಇದರ ಬಗ್ಗೆ ನಮ್ಮ ನೋಡುಗರಿಗೆ ವಿಸ್ತಾರವಾಗಿ ಹೇಳಬಹುದಾ ?
Dr ಭಾಗೀರಥಿ: ಎಲ್ಲ ಉಪಸರ್ಗಗಳ್ಳನ (prefix) ತೆಗೆದು ಹಾಕಿ. “Yoga is one, Yoga is a Method” ಅಷ್ಟೇ. ಯೋಗದಲ್ಲಿ ಅಷ್ಟಾಂಗ ಸೇರಿಸಿ ಮಾಡುವುದನ್ನ “ಅಷ್ಟಾಂಗ ಯೋಗ” ಎಂದು ಪಟ್ಟಾಭಿರಾಮನ್ ಜೋಶಿಯವರು ಕರೆದರೆ, ಆಸನಗಳನ್ನ ಸೇರಿಸಿ ಮಾಡುವುದನ್ನ ದೀಪಿಕಾ ಐಯಂಗಾರ್ ಅವರು “ಹಠಯೋಗ” ಎಂದು ಕರೆದರೆ, ಯೋಗಾಭ್ಯಾಸಕ್ಕೆ ನೃತ್ಯ ಶೈಲಿ ಸೇರಿಸುವುದರಿಂದ ವಿನ್ಯಾಸಯೋಗವಾಯಿತು. ಇನ್ನು ಯೋಗವನ್ನ ಯೋಗ ಶಾಸ್ತ್ರದಲ್ಲಿ ಬರುವಂತ ಸೂತ್ರಗಳನ್ನ ಅಳವಡಿಸಿಕೊಂಡು ಅಭ್ಯಾಸ ಮಾಡುವುದನ್ನ ಪತಂಜಲಿ ಯೋಗ. ಹಾಗೆ ಆ ದಿನ ರಥ ಸಪ್ತಮಿಯ ಪ್ರಯುಕ್ತ ಶುರುವಾದ ಯೋಗ ತರಬೇತಿಯ ಸೂರ್ಯನಮಸ್ಕಾರದಲ್ಲಿ ಮಾಡಿದ ರೀತಿ, ನಮ್ಮ ದೃಷ್ಟಿ, ಉಸಿರಾಟ, ಆಸನದ ಸ್ಥಿತಿ ಅದು ಪತಂಜಲಿಯೋಗ, ಹಠಯೋಗ ಮತ್ತು ವಿನ್ಯಾಸ ಯೋಗವು ಕೂಡ ಆಗಿತ್ತು.

ಅನಿಲ್: ರೋಗ ನಿವಾರಣೆಗೆ ಆಸನಗಳನ್ನೇ ಮೊದಲು ಮಾಡಲು ಹೇಳುತ್ತಾರೆ. ಆಸನಗಳನ್ನು ಅಭ್ಯಾಸ ಮಾಡುವ ಮೊದಲು ಸೂರ್ಯನಮಸ್ಕಾರ ಹಾಕಲು ಹೇಳುತ್ತಾರೆ. ಅರೋಗ್ಯ ದ್ರಷ್ಟಿಯಿಂದ ಯೋಗದ ಅಗತ್ಯ ಹಾಗೂ ಮಹತ್ವಗಳೇನು ಹಾಗೂ ಯೋಗ ಅಭ್ಯಾಸವನ್ನು ಭಾರತದ ಶಾಲೆಗಳಲ್ಲಿ ಇದುವರೆಗೆ ಕಡ್ಡಾಯ ಶಿಕ್ಷಣ ಮಾಡಿಲ್ಲ ಅದಕ್ಕೆ ಕಾರಣವೇನಿರಬಹುದು ಹಾಗೂ ಅದನ್ನು ಕಡ್ಡಾಯ ಶಿಕ್ಷಣ ಮಾಡುವದರ ಬಗ್ಗೆ ನಿಮ್ಮ ಅಭಿಪ್ರಾಯಗಳೇನು?
Dr ಭಾಗೀರಥಿ: ನನ್ನ ಪ್ರಕಾರ ದೇಹಕ್ಕೆ ರೋಗವೇ ಇಲ್ಲ. ಇರುವ ರೋಗಗಳೆಲ್ಲವೂ ಮನಸ್ಸಿನ ರೋಗಗಳು. ಮನಸ್ಸನ್ನ ಹದಮಾಡದಿದ್ದಲ್ಲಿ ಆ ಮನಸಿನ್ನ ಚಿಂತನೆಗಳು, ಗೊಂದಲಗಳು ಉಪಪ್ರಜ್ಞೆಯಿಂದ (subconscious) ಅತಿಪ್ರಜ್ಞೆ (superconscious)ಯನ್ನ ತಲುಪಿ ಅಲ್ಲಿಯೂ ನೆಲೆ ಸಿಗದಿದ್ದಾಗ ನಿಧಾನವಾಗಿ ದೇಹಕ್ಕೆ ಸೇರಿ ದೈಹಿಕ ರೋಗಗಳಾಗುತ್ತವೆ. ಮನಸ್ಸಿಗೆ ರೋಗ ಬರುವ ಮುನ್ನ ಯೋಗಾಭ್ಯಾಸ ಮಾಡಿ. ಇದಕ್ಕೆ ಪೂರಕವಾದ ಒಂದು ಸಣ್ಣ ಉದಾಹರಣೆ ಎಂದರೆ ೨೦೧೦ರಲ್ಲಿ ಒಂದು ಗಂಭೀರ ಅಪಘಾತದಿಂದ ಆದಂತಹ ಹಾನಿಯಿಂದ ಹೊರಬರುವುದಕ್ಕೆ ಸರಿಯಾಗಿ ೧೦ವರ್ಷಗಳು ಬೇಕಾಯಿತು ಜೊತೆಗೆ ನನ್ನ ನಂಬಿಕೆ, ವಿಶ್ವಾಸ ಹಾಗು ಯೋಗಾಭ್ಯಾಸದಿಂದ ಮಾತ್ರ ಸಾಧ್ಯವಾಯಿತು.
ಶಿಕ್ಷಣದಲ್ಲಿ ಯೋಗ ಬರದೇ ಇರುವದಕ್ಕೆ ಸಾಕಷ್ಟು ಕಾರಣಗಳಿವೆ ಹಿಂದುಗಳಿಗೆ ಸೀಮಿತ ಅಂತ ಇರುವ ಭಾವನೆಯಿಂದ ಶಿಕ್ಷಣ ಎಂಬ ವ್ಯವಹಾರಕ್ಕೆ ತೊಂದರೆ ಆಗಬಹುದು ಅನ್ನುವುದು ನನ್ನ ಅಭಿಪ್ರಾಯ. ಹಾಗೇನೇ ನಮ್ಮ ಪ್ರಧಾನ ಮಂತ್ರಿಗಳಾದ ಮೋದಿಜಿಯವರು ಅದರ ನಿಟ್ಟಿನಲ್ಲಿ ಕೆಲಸವನ್ನ ಮಾಡ್ತಾ ಇದ್ದಾರೆ. ಮತ್ತು ಸುಮಾರು ಶಾಲೆಗಲ್ಲಿ ಈಗಾಗಲೇ ಶುರುವಾಗಿದೆ. ಇನ್ನು ಮುಂದೆ ಖಂಡಿತವಾಗಿಯೂ ಕಡ್ಡಾಯವಾಗುವ ಸಾಧ್ಯತೆ ಸಾಕಷ್ಟಿವೆ. ಒಬ್ಬ ವಿದ್ಯಾರ್ಥಿಗೆ ಯೋಗ ಶಿಕ್ಷಣದಿಂದ ಭಕ್ತಿ, ಸಂಸ್ಕಾರ, ಸಂಸ್ಕೃತಿ ಉಳಿವುದರ ಜೊತೆಗೆ ಅವನು ಒಬ್ಬ ಸತ್ಪ್ರಜೆಯಾಗುತ್ತಾನೆ.

ಪವಿತ್ರ: ಯೋಗದಲ್ಲಿ ಬಹು ಮಹತ್ವವಾದುದ್ದು ಪ್ರಾಣಾಯಾಮ. ಅದರಲ್ಲಿ ಪೂರಕ, ಕುಂಭಕ ಮತ್ತು ರೋಚಕ ಮೂರು ಕ್ರಿಯೆಗಳಿವೆ ಎಂದು ಕೇಳಿದ್ದೇವೆ. ಪ್ರಾಣಾಯಾಮ ಕ್ರಿಯೆಯ ಬಗ್ಗೆ ನಮ್ಮ ನೋಡುಗರಿಗೆ ವಿಸ್ತಾರವಾಗಿ ಹೇಳಬಹುದಾ? ಉಸಿರಾಟದ ನಿಯಂತ್ರಣದಿಂದ ನಮ್ಮ ಮನಸನ್ನ ಸ್ತಿಮಿತದಲ್ಲಿಡಲು ಸಾಧ್ಯವಾ?
Dr ಭಾಗೀರಥಿ: ಪ್ರಾಣಾಯಾಮ ಆಗಿರಬಹುದು ಅದರ ಪ್ರಕಾರಗಳು ಆಗಿರಬಹುದು ಅದನ್ನ ಇಲ್ಲಿ ಹೇಳುವ ಬದಲು ಸಾವಕಾಶವಾಗಿ ಅವಗಳನ್ನ ಮಾಡಿಸುವುದರಿಂದ ಅದಕ್ಕೆ ಅವರಿಗೆ ಉತ್ತರ ಸಿಗುತ್ತದೆ. ಏಕೆಂದರೆ ಇದು ಒಂದು ಅನುಭವ ನಿಮ್ಮ ಅನುಭವನ್ನ ನೀವೇ ಪಡೆದರೆ ಚೆನ್ನ.
ಮನ್ನಸಿನ ಸ್ತಿಮಿತವನ್ನ ಖಂಡಿತವಾಗಿ ಕಾಪಾಡಿಕೊಳ್ಳಬಹುದು. ಮನುಷ್ಯನ ಪ್ರತಿಯೊಂದು ಕಾರ್ಯಗಳು ಉಸಿರಾಟದ ಮೇಲೆ ನಿರ್ಭರವಾಗಿದೆ. ಹಾಗಿದ್ದಲ್ಲಿ ಆ ಉಸಿರಾಟದ ಸಮತೋಲನ ಮಾಡುವುದರಿಂದ ಮನಸನ್ನ ನಿಯಂತ್ರಣದಲ್ಲಿ ಇಡಲು ಬಹು ಸಹಾಯಕಾರಿ. ಯೋಗ ಎಂದರೆ ದೇಹ ಮತ್ತು ಮನಸ್ಸನ್ನು ಕೂಡಿಸುವುದು.

ಗಣ: ಒಬ್ಬ ಕನ್ನಡತಿಯಾಗಿ, ಕನ್ನಡದ ಅಭಿಮಾನ ಮೇಲೆತ್ತುವಲ್ಲಿ ತಾವು ಹಲವಾರು ದೇಶಗಳಲ್ಲಿ ಈಗಾಗಲೇ ಯೋಗದ ಬಗ್ಗೆ ಅಚ್ಚ ಕನ್ನಡದಲ್ಲಿ ಅನಿವಾಸಿ ಕನ್ನಡಿಗರಿಗೆ ಯೋಗ ಕಲಿಸುತ್ತಿದ್ದೀರಿ. ಕನ್ನಡಿಗರುಯುಕೆ ಮೂಲಕ ಯುಕೆಯಲ್ಲಿ ಕಳೆದ ೭-೮ ತಿಂಗಳಿಂದ ಯೋಗ ಶಿಬಿರವನ್ನು ಪ್ರತಿ ವಾರ ತಪ್ಪದೆ ೧೦೦ ಕ್ಕೂ ಹೆಚ್ಚು ಪರಿವಾರಗಳಿಗೆ ಕಲಿಸಿಕೊಡುತ್ತಿದ್ದೀರಿ. ಒಳ್ಳೆಯ ಪ್ರತಿಕ್ರಿಯೆ ದೊರಕುತ್ತಿದೆ. ಇದರ ಬಗ್ಗೆ ನಿಮ್ಮ ಅನಿಸಿಕೆಗಳೇನು ? ಮುಂದಿರುವ ತಮ್ಮ ಯೋಜನೆಗಳೇನು ?
Dr ಭಾಗೀರಥಿ: ಜೀವನದಲ್ಲಿ ಏನು ಹೇಗೆ ಬರುವುದು ಅದನ್ನ ದೇವರ ಪ್ರಸಾದವೆಂದು ಸ್ವೀಕರಿಸುತ್ತೇನೆ. ಇದು ನನ್ನ ಮುಂದಿನ ಭವಿಷ್ಯದ ವಿಚಾರ.
ಕನ್ನಡಿಗರುಯುಕೆಯ ಬಗ್ಗೆ ಮಾತನಾಡಲು ನನ್ನಲ್ಲಿ ಪದಗಳಿಲ್ಲ. ಕನ್ನಡಿಗರುಯುಕೆ ಎಂದರೆ ಪ್ರೋತ್ಸಾಹ, ಒಗ್ಗಟ್ಟು, ಶಿಸ್ತು, ಶ್ರದ್ದೆ, ಗುರು ಭಕ್ತಿ ಹಾಗು ಎಲ್ಲಾ UKಯಲ್ಲಿನ ಕನ್ನಡಿಗರು ನನ್ನ ಕುಟುಂಬಸ್ಥರು. ಮೊದಲಿಗೆ ಬಂದು ಯೋಗ ಶಿಬಿರವನ್ನ ಆನ್ಲೈನ್ನಲ್ಲಿ ಶುರು ಮಾಡಬೇಕೆಂದಿದ್ದೇನೆ ಎಂದು ಹೇಳಿದಂದಿನಿಂದ ಇವತ್ತಿನವರೆಗೂ ಒಳ್ಳೆಯ ಪ್ರತಿಕ್ರಿಯೆ ಕೊಟ್ಟಿದ್ದಲ್ಲದೆ ಯೋಗ ತರಗತಿಗಳನ್ನ ನಿರಂತರವಾಗಿ ಮಾಡಿಕೊಂಡು ಬರಲು ಬೇಕಾದ ಎಲ್ಲ ಸವಲತ್ತುಗಳನ್ನ ಮಾಡಿ ಕೊಟ್ಟಿರುವ ಕನ್ನಡಿಗರುಯುಕೆಗೆ ನನ್ನ ಅನಂತ ವಂದನೆ ಎಂದರು.

Dr ಭಾಗೀರಥಿ: ಇವತ್ತಿನ ಉಡುಗೊರೆಯೆಲ್ಲ ಕನ್ನಡಿಗರುಯುಕೆ ಕೊಟ್ಟಿದ್ದು ಅದಕ್ಕೆ ನಾನು ಸದಾ ಚಿರ ಋಣಿ ಎಂದರು.

ಕಡೆಯದಾಗಿ ಗಣಪತಿ ಭಟ್ ಅವರು UK ಯಲ್ಲಿನ ಎಲ್ಲ ಕನ್ನಡಿಗರಿಗೆ, ಕನ್ನಡಿಗರುಯುಕೆ ಕಾರ್ಯಕಾರಿ ಸಮಿತಿಯ ಎಲ್ಲ ಸದಸ್ಯರಿಗೆ ಧನ್ಯವಾದಗಳನ್ನ ಅರ್ಪಿಸುತ್ತ ಕಾರ್ಯಕ್ರಮವನ್ನ ಮುಕ್ತಾಯಗೊಳಿಸಿದರು.

Report by Pavitra

Leave a Reply

Your email address will not be published. Required fields are marked *